ەگەمەندىكتەر ءوز وقىرماندارىمەن شىعارماشىلىق بايلانىس جاساۋدى ۇدايى باستى نازاردا ۇستاپ كەلەدى. بۇل يگى ءداستۇر بۇگىن الماتىدا جالعاسىن تاپتى.
«ەگەمەن قازاقستان» گازەتىنىڭ باسشىلىعى زيالى قاۋىم وكىلدەرىمەن بىرگە الماتى قالاسىنداعى قوڭىر ماندوكي اتىنداعى №154 جالپى ءبىلىم بەرەتىن مەكتەپ ۇجىمىمەن كەزدەستى.
ەسىمى كۇللى تۇركى الەمىنە كەڭىنەن تانىمال, قازاق ءتىلىنىڭ جاناشىرى, ەۋروپانىڭ XX عاسىرداعى اسا ءىرى عالىمى ماندوكي يشتۆان قوڭىردىڭ ەسىمىمەن اتالاتىن ءبىلىم شاڭىراعىندا وتكەن كەلەلى كەزدەسۋ مەكتەپ ۇستازدارى مەن جاس شاكىرتتەردى ۇلكەن اسەرگە بولەدى. كەزدەسۋگە «ەگەمەن قازاقستان» گازەتى اق باسقارما توراعاسى دارحان قىدىرالى, باسىلىمنىڭ الماتىداعى تىلشىلەر قوسىنىنىڭ مەڭگەرۋشىسى نۇرعالي وراز, ۆەنگريانىڭ الماتىداعى باس كونسۋلى فەرەنتس بلاۋمانن, قوڭىر ماندوكيدىڭ جارى وڭايشا ماقسۇمقىزى, تۇركى كەڭەسى جانىنداعى اقساقالدار كەڭەسىنىڭ مۇشەسى, بەلگىلى عالىم ءادىل احمەتوۆ, قىرعىزستانداعى ماناس تۇركى ۋنيۆەرسيتەتىنىڭ پروفەسسورى قادىرالى قوڭقاباەۆ, بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك سىندى بىرقاتار زيالى قاۋىم وكىلدەرى قاتىستى.
باسىلىم باسشىسى دارحان قۋاندىق ۇلى كەزدەسۋدىڭ ماڭىزدىلىعىنا توقتالا كەلىپ, عاسىرلىق تاريحى بار اتا باسىلىمدا بىلتىردان بەرى پەداگوگيكا سالاسىنا بىردەن-ءبىر باسىمدىق بەرەتىن ءبىلىم بەرۋ ءىسىنىڭ قىزمەتكەرلەرىنە, اتا-انالار مەن وقۋشىلارعا ارنالعان تاجىريبە الماسۋدىڭ ورتاق الاڭىنا اينالعان ء«بىلىم» جانە ء«تالىم» بەتتەرىنىڭ ۇزدىكسىز شىعىپ كەلە جاتقانىن تىلگە تيەك ەتتى. بيىلعى وقۋ جىلىنان باستاپ مەكتەپتەرگە ەنگىزىلە باستاعان جاڭا ءبىلىم بەرۋ جۇيەسىنىڭ ارتىقشىلىقتارى, بىلىكتى ۇستازداردىڭ تىڭ تاجىريبەلەرى مەن تانىمدىق ماتەريالدارى, ءبىلىم بەرۋدىڭ جاڭارتىلعان مازمۇنىنا ساي زەردەلى زەرتتەۋلەر, اتقارىلىپ جاتقان باسقا دا كوپتەگەن يگى شارۋالاردىڭ گازەت بەتىندە ۇزدىكسىز كورىنىس تاۋىپ جاتقانىن, بۇل ءوز كەزەگىندە, ەل دامۋىنىڭ نەگىزگى كۇشتەرىنىڭ ءبىرى سانالاتىن جالپى ورتا ءبىلىم بەرۋ سالاسىنا, ۇستازدار قاۋىمىنا باسىلىم تاراپىنان كورسەتىلىپ وتىرعان قولداۋ ەكەنىن ايتتى.
سونىمەن بىرگە اتالعان ءبىلىم شاڭىراعىنىڭ تۇركى دۇنيەسىنىڭ تولاعاي تۇلعاسى ماندوكي يشتۆان قوڭىردىڭ اتىمەن اتالۋىنىڭ تەگىن ەمەس ەكەنىن, ول كىسىنىڭ قايراتكەرلىك جولى جاس ۇرپاققا ۇلگى ەكەندىگىن ايتا كەلىپ مەكتەپ ۇجىمىنا «حالىقارالىق تۇركى اكادەمياسىندا» جارىق كورگەن سۋ جاڭا كىتاپتار سەرياسىن سىيعا تارتتى.
القالى باسقوسۋعا كەلگەن زيالى قاۋىم وكىلدەرى مەملەكەت دامۋى ءۇشىن جاستارىمىزدىڭ جان-جاقتى ءبىلىمدى زياتكەر ۇرپاق بوپ قالىپتاسۋى ازا ماڭىزدى ەكەنىن توقتالىپ, جاس شاكىرتتەر مەن مەكتەپ ۇجىمىنا تولايىم تابىستار تىلەدى. مەكتەپ ونەرپازدارىنىڭ مىڭ بۇرالعان ءبيى مەن كۇمبىرلەگەن كۇيى كەزدەسۋگە جيىلعان قوناقتاردى قۋانىشقا بولەپ, زامانداستارى تاراپىنان قوڭىر ماندوكي جايلى اسەرلى ەستەلىكتەر ايتىلدى.
كەزدەسۋ سوڭىندا اتالعان ءبىلىم شاڭىراعىنىڭ ديرەكتورى قالامقاس الماسباەۆا زور قۋانىشىن جەتكىزىپ, كەلگەن قوناقتارعا العىسىن ءبىلدىردى.
ارمان وكتيابر, «ەگەمەن قازاقستان» الماتى